Dé dl’autonomia 2014

La Dé dl’autonomia, ai 5 de setëmber, é l’ocajiun por la junta provinziala y le consëi provinzial por ti presentè l’aministraziun ala popolaziun tres n dé dla porta daverta. “I aratun che chësta scomenciadia dëides avijiné ćiamò deplü l’aministraziun y la zitadinanza”, spliga le presidënt Arno Kompatscher.

Le Dé dla porta daverta é la desmostraziun de n’aministraziun provinziala daverta y trasparënta: “Chësc dé ti vëgnel pité ala jënt l’ocajiun da ti dè n’odlada al’aministraziun y, ćiodì pa nia, al personal da ti mostrè ala familia le post olache al laôra”, sotrissëia Kompatscher.

Te döt le Südtirol garantësc la Provinzia i sorvisc ala jënt tres incër cënt sëntes y 3mile colaboradus y colaboradësses. Dl’aministraziun provinziala ne fêjel nia ma pert i ofizi, mo inće i sorvisc de orientamënt profescional, i zëntri de mediaziun dl laûr, i ofizi de cataster y liber fondiar, les ćiases di parcs naturai, i museums y les staziuns forestales. Düć tignarà davert inće en vëndres, ai 5 de setëmber dales 13 ales 17.

Te 18 palac provinziai ti gnaràl pité ala jënt dlungia la daurida arlungiada n program por la fà fà para: tla sënta dl Consëi provinzial, tl Palaz Widmann, te d’atri 10 palac provinziai a Balsan y tles sëntes de Porsenù, Bornech, Maran, Egna y Solaneres podaràn s’incuntè cun le personal provinzial y conësce da daimprò la varieté di sorvisc y dles prozedöres aministratives. "Tl consëi provinzial, le majer organism rapresentatif y dezijional dla Provinzia - spliga le presidënt dl consëi provinzial Thomas Widmann - jaràra da ti ćiarè a düć i vari de na lege ćina a süa aprovaziun". Tl Palaz Widmann, sënta dla junta provinziala, podaràn ti ćiarè, ai 5 de setëmber al ofize dl presidënt Kompatscher y se sentè jö tl salf dles sentades dla junta.

Plaza Silvius Magnago, che coliëia le consëi provinzial cun le Palaz Widmann, sarà le zënter dl Dé dl’autonomia: sön la stiga dl palaz dl consëi – olache al é preodü inće le salüt ofizial di presidënć Kompatscher y Widmann – sonarà dales 16.30 trëi bands de jogn dl Südtirol, dl Trentin y dl Tirol. Sön la medema plaza saràl n’esposiziun particolara: 15 sorvisc – dal’Avocatöra al’Informatica, dala Zentrala viabilité al Sorvisc meteo, dal’Euregio ai Museums, dai Sorvisc di rüs de munt ala Proteziun zivila – mostrarà la varieté di dovëis dl’aministraziun provinziala.