De dl’Autonomia 2015

Le De dl’Autonomia, ai 5 de setëmber, é l’ocajiun por la junta provinziala y le consëi provinzial por ti presenté l’aministraziun ala popolaziun tres n de dla porta daverta. La tematica zentrala dl De dla Porta daverta dl 2015 sará la familia. Tl Palaz Widmann, tl Consëi provinzial, tl Palaz provinzial 2 y sön la Plaza Silvius Magnago se presentëia l’aministraziun publica te döta süa varieté. Tl focus sará chësc ann dantadöt i sorvisc che reverda les families.

Le De dla porta daverta é na poscibilité da descurí da plü daimpró les ativités, les prozedöres y les porsones che fej pert dl’aministraziun publica: “N chësc de ti vëgnel pité ai zitadins l’ocajiun da ti dé n’odlada al’aministraziun y, ciodí pa nia, al personal da ti mostré ala familia le post olache al laora”, sotrissëia le presidënt dla Provinzia Arno Kompatscher.

Te döt le Südtirol garantësc la Provinzia na seria de sorvisc ai zitadins cun incër cënt sëntes y 3mile colaboradus y colaboradësses. Dl’aministraziun provinziala ne fejel nia ma pert i ofizi, mo ince i sorvisc de orientamënt profescional, i zëntri de mediaziun dl laur, i ofizi de cataster y liber fondiar, les ciases di parcs naturai, i museums y les staziuns forestales. Tratan le de dla porta daverta dl’aministraziun publica ai 5 de setëmber gnarál propi presenté n mix de chisc sorvisc dales 10.00 ales 17.00 diretamënter tla Plaza Silvius Magnago y tles sëntes de laur atira dlungia.

Plaza Silvius Magnago

„Tl consëi provinzial, le majer organism rapresentatif y dezijional dla Provinzia - spliga le presidënt dl consëi provinzial Thomas Widmann - jarára da ti ciaré a düc i vari dl percurs de na lege dala proposta cina a süa aprovaziun". Tl Palaz Widmann, sënta dla junta provinziala y dl presidënt, podarán ti ciaré, danterater, al ofize dl presidënt Kompatscher y se senté jö tl salf dles sentades dla junta. Dales 10.00 ales 12.00 y dales 13.00 ales 14.00 podarán ince ascuté a sonadus de stomënc a fle de lëgn y de erpes dles scores de musiga ladines y todësces pro l’entrada dl Palaz provinzial 1.

La familia

Tla curt interna dl Palaz Widmann presentará l’Agenzia por la familia por le pröm iade sü proiec y sües ativités a n publich plü ampl. La familia é ince le tema zentral dl De dla porta daverta dl 2015 y sará ince la cornisc prinzipala di stang presënc dles repartiziuns y di ofizi tla Plaza Silvius Magnago. An ciafará informaziuns menüdes sön tematiches dles families y i geniturs podará ince fá n test por valuté sües competënzes d’educaziun. Por i mituns y les mitans gnarál arjigné ca na lerch aposta cun jüc y ativités d’aorela cörta da pastelné y da depënje adöm cun le Clown Malona. Dales 15.00 gnarál surandé dales assessuries competëntes le poch de libri Bookstart. De plü films sön la familia gnará indere mostrá dales trëi Repartiziuns culturales dla Provinzia tl Palaz provinzial 2 cun l’auditorium che se trasformará te n salf da cinema.

Musica live

La Plaza Silvius Magnago, che coliëia le consëi provinzial cun le Palaz Widmann, sará le zënter dl De dl’autonomia. Dlungia l’entrada al Palaz provinzial 2 sonarál dales 14.30 inant la band musicala „Oyster“, che é conesciüda dantadöt por sües melodies jazz. Dan l’entrada dla sënta dl Consëi provinial gnarál premié dales 16.30 inant, do n discurs dl presidënt dla Provinzia Arno Kompatscher, i mius maturanc dl ann de scora impormò stlüt jö. La plaza instëssa se trasformará dales 10.00 inant te na paladina de presentaziun di sorvisc plü interessanc che vëgn pitá dal’aministraziun publica.