N ejëmpl internazional

Tl Südtirol se dá jö tröpes istituziuns politiches y scientifiches, l'aministraziun publica y ince scomenciadies privates desvalies da dezens incá cun l'autonomia y la sconanza dles mendranzes. Al é ince istituziuns dl Südtirol che colaborëia regolarmënter cun organisaziuns internazionales importantes - danterater cun l'OSCE y cun le Consëi d'Europa - sciöche ince cun governs sura döt le monn. L'autonomia dl Südtirol rapresentëia n model aprijé a livel internazional tl ciamp dla sconanza dles mendranzes y di dërc dles mendranzes. Chësc savëi vëgn dé inant por mirit dles ativités de divulgaziun dl'Eurac Research a Balsan.

Eurac Research: le zënter de competënza por l'autonomia dl Südtirol

Dal 1992 incá se dá jö l'Eurac Research te na manira scientifica cun chestiuns che reverda la sconanza dles mendranzes, la varieté culturala, l'autonomia y le federalism. Les esperiënzes fates te nosta provinzia y döt le savëi colié impara dess ince jí a bëgn de d'atres mendranzes che se dá da fá por arjunje süa autonomia y mantigní süa identité.

Center for Autonomy Experience

Dal 2020 incá é ince atif tl'Eurac le "Center for Autonomy Experience" sciöche post d‘intermediaziun y referimënt por ativités y scomenciadies che reverda la sconanza dles mendranzes tl Südtirol y le model d'autonomia sudtirolesc. Le fin de chësta istituziun é da partí les esperiënzes dl Südtirol, dé inant savëi y cherié insciö na rëi internazionala y locala sterscia.

Sostëgn de proiec por la sconanza de mendranzes linguistiches

L'autonomia dl Südtirol pita la basa por le mantignimënt dla varieté etnica y culturala tla provinzia. La Junta provinziala dl Südtirol se dá ince da fá por la sconanza di grups etnics a livel europeich y internazional.

Domanda de sostëgn

La Provinzia de Balsan sostëgn la sconanza dles mendranzes linguistiches y culturales sciöche ince proiec de sensibilisaziun y d‘aprendimënt global. Dötes les informaziuns detaiades y i recuisic por fá domanda ciafëise tl Ofize Relaziuns esteres y volontariat.

Le pest dles mendranzes

La Junta provinziala pó ti surandé a personalités che se dá dantadöt da fá por la sconanza y la convivënza en pesc de grups linguistics le pest dles mendranzes. Le pest é n atestat y n pest de scioldi de 20.000,00 euro.

Cina ciamó é le pest dles mendranzes gnü surandé trëi iadi: a August Gril, rapresentant dla popolaziun di Gottscheer tla Slovenia, al'Uniun Federala dles Nazionalités Europeiches (Federal Union of European nationalities FUEN) y a Tenzin Gyatso, le 14ejim Dalai Lama.