Rapresentanza a Roma

La rapresentanza dla Provinzia autonoma de Balsan a Roma é na sënta de intermediaziun por informaziuns danter i organs zentrai statai, la Conferënza Stat-Regiuns y i ofizi provinziai. Ara é organisada insciö:

Conferënza dles Regiuns y dles Provinzies autonomes

La Conferënza dles Regiuns y dles Provinzies autonomes é gnüda metüda sö de jená dl 1981, por podëi coordiné damí i interesc dles Regiuns y Provinzies autonomes devers dl stat talian (zentral). La Conferënza dles Regiuns y dles Provinzies autonomes é metüda adöm dai presidënc y dales presidëntes dles 20 Regiuns y dles döes Provinzies autonomes de Trënt y de Balsan. Cun na delegaziun aposta pól tó pert ales sentades ince les assessuries y i assessurs regionai y provinziai.

Organisaziun dles ativités

Dal 2005 incá vëgn les ativités, che é gnüdes definides danü de ma dl 2021, desfirades da comisciuns permanëntes. Implü él gnü lité danü la presidënza. Chëstes é les Comisciuns:

1. Comisciun Afars istituzionai y generai
2. Comisciun Afars finanziars
3. Comisciun Afars comunitars y internazionai
4. Comisciun Infrastrotöres, Mobilité y Govern dl teritore
5. Comisciun Ambiënt, Energia y Sostignibilité
6. Comisciun Cultura
7. Comisciun Sport
8. Comisciun Sanité
9. Comisciun Politiches soziales
10. Comisciun Istruziun, Université y Inrescida
11. Comisciun Laur y Formaziun profescionala
12. Comisciun Politica agrara
13. Comisciun Svilup economich
14. Comisciun Proteziun zivila
15. Comisciun Inovaziun y Digitalisaziun
16. Comisciun Imigraziun
17. Comisciun Turism

Les Comisciuns é metüdes adöm dales assessuries y dai assessurs regionai y provinziai competënc. Süa gestiun vëgn renovada paralelamënter cun la Conferënza dles Regiuns y dles Provinzies autonomes vigni cin’ agn.

De plü informaziuns é da ciafé sön la plata web dla Conferënza dles Regiuns.

Conferënza Stat-Regiuns

La Conferënza Stat-Regiun é gnüda metüda sö dl 1983 por sostigní la colaboraziun danter les Regiuns y les Provinzies autonomes cun le Stat. Les funziuns dla Conferënza Stat-Regiuns é gnüdes regolamentades impormó dl 1997. La Conferënza mëss informé, aconsié y dé jö arac. Ara stlüj jö ince intenüdes y acordanzes y pó mëte sö comisciuns y nominé rapresentanzes dles Regiuns y dles Provinzies autonomes.

Composiziun

La Conferënza é metüda adöm dal Minister/dala Ministra di Afars Regionai, che é a ce sön inciaria dl presidënt/dla presidënta dl Consëi di ministri, y dai presidënc y dales presidëntes dles Regiuns y Provinzies autonomes. Le presidënt/La presidënta pó ince invié a tó pert ales sentades d’atri ministri y d’atres ministres y d’atres rapresentanzes politiches che se dá jö cun i argomënc tratá.

Conferënza unificada

Tres la Conferënza Unificada metüda sö dl 1997 dessel gní renforzé la colaboraziun danter le Stat y i ënc locai (Regiuns, Provinzies, Comuns y Comunités de munt) por coordiné les ativités legislatives y aministratives. Sciöche la Conferënza Stat-Regiuns pó ince la Conferënza Unificada formulé arac y deliberaziuns y stlüje jö intenüdes y acordanzes. Ara é metüda adöm dai componënc dla Conferënza Stat-Regiuns, sciöche ince dai componënc dla Conferënza Stat-Cités y Autonomies locales. Pro les ultimes toca le Minister/la Ministra dl Intern, che é a ce, val’ ministri y ministres y rapresentanzes de Comuns y Provinzies.

Consulënza

Ëise debojëgn d’aiüt pro chestiuns che reverda i ofizi publics. Cherdede sö chësc numer de telefon 06979111 o menede na e-mail a aussenamtrom@provinz.bz.it.

Practicum a Roma

Studëntes y studënc universitars y porsones che s'á impormó laureé pó fá n practicum tl Ofize de Roma dla Provinzia autonoma de Balsan. Dlungia les condiziuns generales por fá n practicum de formaziun y orientamënt tl’aministraziun provinziala vál debojëgn de n’idoneité surapró che an arjunj fajon n ejam a usc. An mëss conësce la storia dl’autonomia dl Südtirol, le dërt costituzional y le sistem politich talian en general. L’ejam a usc vëgn fat te tramidui i lingac dla provinzia y pó ince gní fat a Balsan.

Sce i orëis fá n practicum te nosc Ofize de Roma podëise contaté diretamënter la direturia dl ofize, la dot.ia Katharina Tasser, cherdan sö le numer 06-69791120 o ortian na e-mail.